《支持鍾培生追擊林作》
小型富二代想搞中型富二代，我真係要買多兩打啤酒加3包萬里望。
先同讀者交代一下背景。
姓林呢條小型富二代初出道嘅時候，由於作風唔跟大隊，本欄曾經出po讚好，因為從來欣賞嗰啲逆向思維嘅人。
不過好快就發現原來佢唔係獨立思考力排眾議，只不過係反口覆舌講過唔算數（依家仲保存佢關於鄧永鏘劍橋碩士爭論大量cap圖），所以將佢納入周浩鼎同路人。
至於鍾培生，當然係又有錢又串，但係我亦曾經出po讚佢初生之犢不畏虎，竟然夠膽挑戰林建岳（即係中型富二代挑戰巨型富二代），後來畀岳少入稟法庭告誹謗，雖然最後大家四四六六拆掂咗，但係都屬於勇氣可嘉！
呢幾日小型富二代辣㷫咗中型富二代，人哋現兜兜抌一球（出場費）出嚟挑戰佢上擂台，點不知佢縮沙不特止，仲要扮曬嘢話攞二百萬出嚟叫鍾培生畀佢打一鑊（佢仲話讀法律竟然唔知攞錢出嚟打人係犯法？），仲成日認屎認屁話自己條team幾威幾叻，跟呢種大佬乜嘢面都冇曬啦！
重溫《旺角卡門》裏面嘅烏蠅哥（張學友）侮辱萬梓良唔敢還拖嘅金句：「食屎啦你！」
萬梓良成班手下聽完呢句，全部投以不屑眼光轉身走曬……
Search